Leioako unibersidadean ikasten dabizan ikasle batzuek biztu eben metxea eta mahaigaineratu eben arazoa. Izan be, Arratian ez dago unibersidadera joateko autobus zerbitzurik eta Leioako kanpusera helduteko batez beste hiru ordu behar dabez. Aurreko ikasturtean BideON Arratian garraio zerbitzuak Zeanuri eta Leioa lotuko ebazan linea agindu eutsen. Baina ikasturtea hasteko hiru egunetara jakin eben, ez zala halako zerbitzurik egongo. Alternatiba bakarra 07:15ean urten eta Lemoa edo Zornotzara joateko autobusa izan zan, bueltea egiteko zerbitzu barik. Oin BideON zerbitzuak, Lemoan edo Zornotzan ixten ditu ikasleak 07:00etan, handik autobus edo tren bat hartzeako.
Horren aurrean hiru proposamen daukiez ikasleek. Lehenengoa, Zeanuri eta Leioa batuko dauzan linea bat ezartea; beste alternatiba bat, Leioako EHUra doan Usansoloko zerbitzua Zeanurira arte luzatzea; eta hirugarrena, Zeanuritik Bilbora autopistatik doan autobusa unibersidadera arte joatea.
Hiru proposamen horreekaz, Bizkaiko Batzar Nagusietan egon ziran zezeilean eta oin udaletan mozinoak sartzean dabiz bailarako udaletan. “Unibersidadera goazen Arratiako ikasleok, ikastera joateko ez daukagu eskubide dan garraio publiko zerbitzu duina. Egunerokotasunean unibersidadera joateko egin behar doguzan ibilbideek, geltokietako itxaronaldiek eta garraio aldaketek ez ditue gure beharrak asetzen. Segurtasun eta egonkortasun falta handia sentiduten dogu unibersidadera joateko eta handik bueltetako orduan. Itxaroten egon behar garan denporek gure bizitzetan garrantzitsuak eta ezinbestekoak diran gauzak egiteko denporea kentzean deuskue” dinoe mozinoan.
Aprila hasikeran Garraio Saileko Bizkaiko Foru Aldundiko diputaduagaz batuko dira arazoaren eta eskaeren barri emoteko.
Honek guztiak Arratiako garraio publikoa hobetutearen premina begi-bistan ipini dau eta gaia agenda politikoan sartu da.
EAJ_PNVren mozinoa
EAJ-PNVk mozino bateratua aurkeztu dau Arratian, Lemoan geraleku intermodal bat eregiteko eskatzeko arlo horretan eskumena daukien erakundeei. Mobikortasunaren aldetik eskualdearen kohesinoa indartutea eta Bilbo eta beste eskualdeakazko loturak hobetutea litzateke intermodalaren helburua. Baita, eskualdeko garraio sistemea ebaluetea be, Arratiako udalerriek interesgune nagusiakaz (UPV/EHU, ospitaleak, administrazinoak, eta abar) konexinoak hobetuteko. Izan be, mozinoak, “eskualdeko mobikortasuna hobetuteko eta, aldi berean, Bizkaiko beste eskualde batzuekaz konektetako” helburua dauka.
Intermodalak autoa gitxiago erabilten lagunduko leukela uste dabe jeltzaleek. “Lemoako tren geralekuan plataforma intermodal bat ipintea, beste garraiobideakazko konexinoa indartuteko eta ibilgailu pribadua aparkau ahal izateko, disuasino aparkalekua izango leuke. Azpiegitura horreri esker, hobeto integrauko litzatekez trenbide eta autobus zerbitzuak”.
Gainera, plataforma intermodal horregaz lotuko dituan autobus linea barri bat sortzea be eskatuten da mozinoan, trenbideko garraioa errazteko. “Konexino horreri esker, gainera, autobus zerbitzuaren maiztasunak handitu ahal izango litzatekez eskualde barruan, barne mobikortasuna hobetuz eta herritarrei joan-etorriak egiteko aukera gehiago eskainiz. Era berean, ikasleei, prestakuntza zentroetarako garraioa erraztuko leuskie, konexino azkarragoak eta eraginkorragoak bermatuz” azaldu dau Arratiako EAJ-PNVK prensa-ohar batez.
Intermodalidade hau abian ipini bitartean EAJ-PNVk planteau dau “trenen maiztasunak 7 minutuko tartera arte zabaltzea, ikasleen prestakuntza zentroetarako joan-etorriak hobetuten lagunduko leukelako. Horrek zerbitzu hobea ziurtatuko leuke eta garraio publikoaren erabilerea sustatuko leuke ibilbide osoan”.
Diagnostikoa
Arratiako Udalen Mankomunitateak, Bizkaiko Foru Aldundiko Garraio, Mugikortasun eta Turismo Sailaren laguntzeagaz, eskualdeko uri mobikortasun jasangarriaren diagnostikoa egin gura dau, herritarren beharrizanak identifiketako eta horretarako online galdetegia zabaldu dau https://labur.eus/mugikortasungaldeketa estekan. “Diagnostikoak Arratiaren ezaugarrien eta beharren ikuspegi kuantitatiboa eta kualitatiboa emongo dau, udalerrietako persona tipologia eta biztanle gune bakotxerako, eta mobikortasun beharretara egokituta garraio eskaintza hobetzeko tresna izan daiteke” azaldu dabe AUMtik.
Areatzako EH Bilduren mozinoa
Areatzako EH Bilduk be mozinoa aurkeztu dau mobikortasunaren ingurukoa. "EH Bilduren partetik saiatu ginan EAJgaz batera mozino bateratu bat aurrera ateraten, baina euren ezezkoaren aurrean, gurea aurkeztea ebatzi genduan, ulertzen gendualako gurea osoagoa dala" azaldu deutso EH Bilduk BEGITUri ohar baten.
EH Bilduren mozinoak gauza asko ditu komunean EAJren mozinoagaz: Lemoan intermodala egitea, erabiltzaileak plataforma intermodal horregaz lotuko dituan autobus linea barri bat sortzea autobus zerbitzuaren maiztasunak handituteko, eta trenen maiztasunak be 7,5 minuturaino zabaldutea eskatzen dabe.
Horreezaz gainera, EH Bilduren mozinoak be eskatzen dau "Usansolotik Leioako EHUko kanpusera doan autobus linea (2610) Arratiara luzatzea" hausnartutea, eta Arratiatik Gasteizera egiten diran desplazamentuen gaineko azterketea egitea eta "Gasteizko uriburuagaz lotzean gaituan garraio zerbitzuak hobetutea, ordutegiak eta maiztasunak egokituz egindako azterketaren arabera".
