Turismoei gehitzen badeutseguz motozikleta, ziklomotorrak, furgonetak eta kamioiak, 13.055 ibilgailu dagoz erregistrauta begituren eremuan. Arratia, Ubide eta Zeberioko populazinoa 15.417 biztanlekoa izanda, batez beste, 0,87 ibilgailu dagoz biztanleko; 0,58 turismo.
Herriz herri begiratu ezkero; 2023ko datuen arabera, biztanleko turismo gehien daukan herria Zeanuri da (0,69) eta ostean datoz Bedia (0,68) eta Ubide (0,68). Turismo gitxien biztanleko Areatzak daukaz (0,48), Arantzazu (0,52) eta Igorre (0,53) datoz gero. Erdikaldean dagoz Artea (0,57 turismo biztanleko), Dima (0,56), Lemoa (0,55) eta Zeberio (0,59).
Ibilgailu parke osoari begiratu ezkero; kasu berezia da Bediakoa, biztanle baino gehiagoko ibilgailu parke handiagoa dauka-ta; 1,27 proporzinoan. Kamioiek egiten dabe desbardintasun hori; izan be, Bedian 328 kamioi dagoz erregistrauta eta Begituren eremuko kamioi parke handiena dauka. Bere atzean doaz Zeberio (0,95 ibilgailu biztanleko); Artea (0,93); Ubide (0,91); Lemoa (0,88); Dima (0,85); Zeanuri (0,83); Arantzazu (0,74); Igorre (0,73) eta Areatza (0,66).
Bizkaiko beste eskualdeetan legez, gizonek eta 20 eta 64 urte adin tartekoek erabilten dabe gehiago ibilgailu pribadua.
Arratiako garraio publikoa
Ha-ta guzti be Arratian asko erabilten da garraio publikoa; esandako moduan, gazte-gazteek eta zaharrek batez be, baina atzen urteotan beteago doaz autobusak eta leku guztietara heldu daiten zerbitzua hobetuteko aldarria hasi da eskualdean. Metxea biztu eben unibersidadeko ikasle batzuek, ikasturte hasikeran, unibersidadera joateko garraio publikoa eskatu ebenean. Ez ziran horretara mugatu, eta Arratiako garraio publiko beharrak ikertzen hasi ziran.
BEGITUren eremuan, garraio publikoa, autobusak, trena eta BideOn Arratian zerbitzuek osotuten dabe. Autobus zerbitzuari jagokonean, Bizkaibus da ardatza. Bilbo-Zeanuri-Bilbo linea bi dagoz 3917 eta 3927, atzen hau autopistatik doana Bilbora, baina biak ditue geralekuak, Zeanuri eta Bedia arteko herri guztietan, bailara barruko zerbitzua eskainiz. 3925 linea, Bilbotik Ubidera doa, Igorren Dimarantza hartuta. Ubidera ordu biro dago autobusa, Dimaraino orduro. 3928 lineak, Zeberio, Artea eta Igorregaz lotzean dau, baina zerbitzu hau oso urria da, egunean hiruzpalau bider.
Gasteizera joateko La Union enpresako autobusak aste egunetan bitan baino ez dabe zerbitzua eskaintzen. Goizean, 09:45ak aldera pasetan da autobusa Igorretik Gasteizera eta 16:30ak aldera arrastian. Zapatuetan, goizean baino ez dago 09:15ak aldera eta domeketan goizean 11:00ak aldera eta 19:00etan, arrastietan.
Trenak emoten deutso Arratiari itsasora urtekerea; loturea beste eskualdeakaz eta Gipuzkoagaz konexinoa. Lemoak eta Bediak daukie tren geralekua. Lemoakoa da nagusia eta izan barik, intermodal moduan funtzionetan dau; izan be, haraino beste garraiobide erabilita, bertan hartzean dabe arratiarrek trena, Bermeorantza, Donostiarantza edo Bilborantza.
Bideon Arratian eskaripeko zerbitzuak, herrigunetik urrun dagozan auzoak herrigunetara edo eskualdetik kanpoko hainbat zerbitzuetara hurreratzen ditu 65 urtetik gorakoak. Hasikeran beste zerbitzu batzuk eskaintzen saiatu bazan be, proiektu pilotua da, 65 urtetik gorakoen artean ditu ondoen baloretan daben erabiltzaileak.
