Amurriotik urtengo da gaur arrastian 22. Korrika. 16:00etan egingo da aurkezpen ekitaldia, eta ordu erdi beranduago urtengo dira furgonetea, ostetik lekukoa, Euskal Herri osoa euskerearen alde zeharkatzeko.
Eskualdean, lekukoa hartzean lehenak izango dira zeberioztarrak. Arrankudiaga eta Ugaon ditue banatuta kilometroak, izan be, ibilbidea ez da Zeberiotik pasauko. Holan, Arrankudiagako lehen kilometroa (95. km), peajetik hasita, Austarri Mendi Taldeak eta Gure Indarra Jubiladuen Elkarteak egingo dabe, 23:30ean.
Arrankudiagako atzen kilometroa be, Korrikako 102. kilometroa, Zeberioko eskoleak eta Guraso Elkarteak gidatuko dabe, 23:50 aldean. Gero, Korrika Ugaon sartuko da, bertako alkarteen ostean Arrigorriagara sartu aurreko kilometro biak be izango dira zeberioztarrenak, 00:10 aldean. Bentakorrekako tunelean hartuko dau lekukoa Zeberioko EH Bilduk, gero Austarri Kultur Elkarteak eta amaitzeko, Zeberioko Udalak Martiartuko biribilgunean.