Zapatuan emon jakon amaierea Bizkaiko LV. Herriarteko Txapelketeari Gernikako Santanape pelotalekuan, pasau dan urtean modura, Zeanuri eta Markina-Xemeingo pelotarien arteko finalakaz. Kadete, jubenil eta nagusien mailako finalak jokatu ebezan herri bietako pelotariek eta markinarrak nagusitu ziran, aurrez aurreko guztietan. Holan, Markina-Xemeinera joan ziran txapelak, atzen hiru edizinoetan lez.
Kadeteen mailako finala Gortazar eta Beobide zeanuriztarrek jokatu eben eta 22-4 amaitu zan partidua markinarren alde. Bigarren finalean be, jubenil mailakoan, markinarrak oso gainetik egon ziran eta Ozerinjauregi eta Egiliorren tantu bakarra egitea lortu eben, 22-1 amaituta. Maila gorenean be, herriarteko txapelak ebatzita egonda, Markina-Xemein urten zan garaile Etxeita eta Erkiaga II.aren kontra, 22-12.