Ahoztar Zelaieta kriminologo eta ikerketa-kazetari entzutetsua Zeanurira konbidau dabe, herrian mediku falteagaz izan dabezan arazoak dirala-ta, Osakidetzaren gainean berba egiteko. Aprilaren 3an, eguena, 19:00etan izango da Zelaieta Zeanuriko Kultur Etxean eta bertan, Diagnóstico Tolosaldea. La privatizacion de la sanidad en el oasis vasco ikerketa liburua aurkeztuko dau, Osakidetzak hartu dauan bide estrategikoaz berba egiteaz gainera.
Lan honetan, Zelaietak Osakidetzaren eta Tolosaldeko Asuncion klinika pribaduaren arteko hitzarmenaren jatorria eta akordio horren ondoren sortutako negozioa deskribiduten dauz. Baita ate birakariak, ustelkeriaz zipriztindutako klientelismoa, sindikatuen salaketak, oposizino politikoa eta honen kontrako mobilizazino soziala be.
Sinposia
Euskal oasiaren koroaren harribitxia, Osakidetza, gainbehera doa eta osasun publikorako eskubidea mehatxatzen dauan faktoreetako bat, osasun zerbitzuak sektore pribatuagaz egiten dituan hitzarmenak dira. Gipuzkoa da hitzarmen gehien dituan lurraldea, eta esparru horretan Tolosako Asunción klinika nabarmentzen da; Osasun Sailak 71 milioi euro injektau deutsaz zentro pribadu horreri 2019tik 2022ra bitartean. Tolosaldeko eskualde osorako erreferentziazko osasun zentroa da, 65 000 biztanletik gorakoa, eta han gertatzen dana osasun publikoaren inguruko krisiaren sintoma da.