Zeanuriko Udalak, Jokin Larrakoetxea zinegotziak azaldu dauanez, "herriari bizitasun apur bat emoteko" antolatu dau Martiko jaia datorren zapaturako, hilak 16. Eguerdian, herri bazkariagaz hasiko da jaia eta gauez, kontzertuak, Mixerableak eta Zaparra taldeak, egongo dira egun osoan zehar zabalik egongo dan frontoiko tabernan. Bazkarirako txartelak 15 eurotan lortu daitekez jubiladuen tabernan, hilaren 11ra arte.
Arrastian barriz, 18:00etatik aurrera, frontoian bertan egongo da giroa, jokatuko diran pala eta frontenis partiduen inguruan. Izan be, Udalak Maialen Landajo pala jokalariari omenalditxoa egin gura izan deutso. Holan, palan arituko dira Maialen Landajo eta Maialen Rodrigez, Maialen Bengoetxea eta Irati Saez-en kontra. Frontenisean ostera, Mikel Izurza eta Imanol Urigoitia, Jokin Larrakoetxea eta Gorka Unzuetaren aurka. Partiduak amaituta, poteo musikatua egingo da herritik.