Zapatuan heldu zan Javier Lopez Katmandura eta bertan alkartu zan Alex Txikonegaz. Aurretik, erronka garrantzitsua daukie Lemoako mendizaleak eta garun-paralisidun zallatarrak: munduko mendi altuenaren kanpamentu nagusira heltzea, 5.364 metroko altuerara. Horretarako, hamar egun inguru egongo dira oinez, eta biak agertu dira ilusinoagaz.
“Urduri nago, baina erronkeari ekiteko gogoz”, esan eban Javier Lopezek bidaiagaz hastean eta Txikonek, "ilusinoz gainezka" dagozala gehitu eban: “Izugarria da Javik daukan borondatearen indarra ikustea. Gu guztiak motibatzen gaitu. Bera hemen egotea asko da. Ziur nago irekiko dauan bidea motibazinoa izango dala jente askorentzat. Jarraitu beharreko eredua da, zalantza barik”.
Ezinezkoa helburu
Javier Lopez eta Alex Txikon aurten alkar ezetu dira lehenengoz, Urbegi Fundazinoak banatzen dauzan Ezinezkoa Sarien banaketa ekitaldian, bagilean. Ekimen horren helburua, "gainditzeko eta enplegagarritasuna hobetzeko espirituaren bitartez laneratzea lortu daben eta, gainera, antzeko egoeran dagozan beste persona batzuen erreferente eta eredu bihurtu diran zaurgarritasun-egoeran dagozan kolektiboetako personen bizi-ibilbideak aintzatestea, gizartean zabaltzea eta balioestea" da. Bertan egin eutsan Txikonek Lopezeri proposamena eta zemendian egin eben espedizino berezi honen aurkezpena Zallan.