Arratiako Berbalagun taldeak, AEKren ekimenez euskaldun zahar eta barriak batuz euskerea praktikan ipintea helburu dauan egitasmoak, zita berezia antolatu dau hilaren 17rako. Hitzordua Lasarte Aretoan izango da, 19:00etan.
Ekitaldian, Arantzarteko jantzarien jantzaldiaz gozatzeko aukerea egongo da, eta, horrezaz gainera, hainbat andrazko kirolariren testigantzak entzuteko tartea be izango dabe bertaratzen diranek.
Mahai-ingurua Arratiako gazte feministek osotzen daben Orratzak taldeko kideek gidatuko dabe. Bertan, batez be Arratiako hainbat kirolarik hartuko dabe parte: besteak beste, Arratia futbol taldeko Nerea Beitia lemoaztarrak eta Olaitz Arroyo igorreztarrak; Ruth Linaza herri kirolari lemoaztarrak; Oneka Aierdi korrikalari igorreztarrak; Harriti giza proba taldeko Urtza Sarrionandia tiralari igorreztarrak; eta Durangoko Jai-Alai taldeko kideek.