Igorrek kale barri bat izango dau Garbe auzoan, Viviendas de Bizkaia eregiten dabilen etxebizitzetatik pasetan dan kalea hain zuzen be. Oin arte ez da bertan etxebizitzen portalik egon eta beraz, izen barik egon da Garbeko beheko zatia. Laster bertan jentea biziko dala-ta, Igorreko Udalak kalea izendatuteko bozketea ipini dau martxan. Bozkatuteko, udaletxean zein Kultur Etxean ipini da mahai bana, hautetsontzi banagaz.
Aprilaren 15era arte egongo da bozkatuteko aukerea eta Udalak, hiru izen proposatu ditu. Lehenengo aukerea "Mari Karmen Madariaga" da, Mari Carmen Madariaga 1927an Igorren jaiotako erraketista profesionala izan zan, Arrati ezizenez ezaguna. Bigarren aukerea "Presagane" da, behetik pasetan dalako Igorreko presak eusten dauan erreka zatia. Atzen aukerea barriz, "Arginatx" da, Igorren izentautako atzen kaleak, inguruko mendien izenak dabezalako.
