Urtero lez, Ganzabal Mendi Taldeak igazko Bilboko Mendi Film Festibaleko pelikuletako batzuk dakarz Igorreko Lasarte Aretora. Sei film aukeratu ditue eta emonaldi saio bi egingo dira, bata pasau dan barikuan egin zan eta hiru film egon ziran ikusgai: Haize lerroak, Always alive eta Of A Lifetime. Atzen hiru filmak gaur, hilak 28, proiektauko dira 19:30etik aurrera: Jamie, Una mirada atrás, el arte de equipar eta Andrea, an unpaved route.
Jamie
Gaur proiektauko dan lehenengo pelikulea 18 minutuko kanadiar filma da, Darcy Hennesseyk zuzendutakoa. Jamie Logan 1970eko hamarkadako mendizale puntakoenetako bat izan zan, lehen igoera ugari egin ebazan Ipar Amerikako hainbat bide gogorretan. Logan alpinista eta arkitekto arrakastatsu, gogor eta kementsuak, 69 urtegaz andra izateko eraldaketea hasi eban, eta oin, 76 urtegaz, mezu hau heldu arazo gura deutse beste trans personei: bizitza ederra izan daitekela, norbere buruagaz errespetuz jokatuz, zintzo izanez eta munduagaz konektatuago egonda.
Una mirada atras, el arte de equipar
Alfonso Garciaren 29 minutuko filmak eskaladan ekipatzeko mundu ezezagunera hurreratzen gaitu. Eskalatzaileen %1ek baino ez dau bide barriak ekipatzen jarduten. Bizitza osoa ekipatzen daroen Euskal Herriko lau eskalatzaile Aritz Aparicio, Guillermo Bañales, Iñaki Marco eta Juan Manuel Hernández dira dokumentaleko protagonistak.
Andrea, an unpaved route
Maxime Moulin frantziarraren 42 minutuko pelikulan Nina Caprez, eskaladaren ikonoa, muturreko kiroletako argazkilaria dan Jérémy Bernard bikotekideagaz, eta euen alaba Liagaz Marokora joango dira Andrea deituriko ibilgailuan. Proiektu oso personala daukie, eta bidean bertako kulturak eta hainbat eskalatzaile ezetuko ditue. Dana dala, bidaiak, eta bizitzaren ustekabeko jira-bueltek, euren poztasunak, kezkak eta nortasun printza sakonak agirian itxiko dabez