Abenduaren 18an jokatuko da 2022ko Bertsolari Txapelketa Nagusiaren final handia Iruñako Nafarroa Arenan, 13.000 ikusleren aurrean. Hara joateko sarrerarik lortu ez dabenek, Igorreko Lasarte Aretoan arrastiko saioa ikusteko aukerea izango dabe, 17:00etatik aurrera. Zinuemako egitarau barruan dago zuzeneko proiekzinoa. Holan, bonuak erosita dabezanak doban sartuko dira, Kultur Etxeko bazkideak hiru euroren trukean eta gainontzekoek, lau euro.
Finalistak zortzi dira: Aitor Mendiluze Gonzalez, Alaia Martin Etxebeste, Amets Arzallus Antia, Beñat Gaztelumendi Arandia, Joanes Illarregi Marzol, Maialen Lujanbio Zugasti, Nerea Ibarzabal Salegi eta Sustrai Colina Acordaerrementeria. Atzen hiru edizinoetako irabazleak dagoz finalisten artean: Maialen Lujanbio (2009, 2017) eta Amets Arzallus (2013). Lau urterik behin jokatuten dan txapelketea da eta aurtengoa, 2021ean jokatu behar zana, COVIDa dala-ta atzeratu zan.