Aurtengoan, urri lehenengoaren 17an ospatuko da Igorreko Inbiu Eguna, egun osoan zehar Kultur Etxeko plazan. Euskerearen erabilerea bultzatzeko helburuagaz antolatu dabe egun osorako egitaraua Igorren Euskera Zuzterretik alkarteak, Igorreko Udalak eta Udalerri Euskaldunen Mankomunidadeak.
Goizez, 11:00etatik aurrera umeentzako jolas eta tailerrak egongo dira, Panpotx kultur alkartearen eskutik. 11:30ean, euskerearen aldeko kartel eta pankartak egiteko materiala banatuko da, holan, kuadrillak be animau gura izan ditue gero kartelak herritik eskegiteko. Goizeko atzen ekintzea Inbiuren kanta barriaren aurkezpena izango da, bazkalaurretik.
Bazkaltzeko, Udalak mahai eta aulkiak ipiniko dauz baina jateko eta edatekoa, bakotxak eroan beharko dau. Bazkaldu ostean barriz, Kittu taldearen erromeria egongo da Kultur Etxeko plazan eta gero, parte-hartzaile guztiak egongo dira herritik abestuten.
Inbiu kantua
Urtero Igorren ospatzen da jaia
aldarrikatzeko biziera
nagusi ta gazte guztiok batera
bakoitzak bere neurrian.
Zuhaitz adarretan, abesten txoriak
egoten dira libre-librean
euskaldunok ere nahi dogu lortzea
askatasuna gure kabian.
Hor dogu euskera
eta harro gu sentitzen gara
etxean zein kalean
berari esker herri bat gara. (bis)
Inbiu, inbiu, euskeraz bizi gura dogu
inbiu, inbiu, euskerak aberasten gaitu.
Inbiu kalean, inbiu etxean, inbiu euskeraz
inbiu klasean, inbiu beharrean, inbiu euskeraz
inbiu tagernan, inbiu olgetan, inbiu euskeraz
inbiu egunez, inbiu gauean, inbiu euskeraz.