Astelehen goizean topau eben Foruzaingo eta suhiltzaileek 2022an biolentzia sexistak aurretik eroan dauan lehenengo andrea. Sara Pina izeneko 38 urteko andrearen gorpua bere etxean topau eben, tripan hainbat labankada jasota. Nafarroako Audientzia Nagusiak azaldu dauanez, hilaren 8a eta 9a artean gertatu zan "bortizkeria handiko" hilketea.
Epaile eta ikerlarientzako, hasikeratik izan da haren gizona susmagarri nagusia. Hau atxilotzeko euroagindua baliatuta, atzo arrastian harrapau eben Frantzian, Bordeletik 65 kilometro iparraldera.
41 urteko gizonak eskuko telefonoa etxean itxita egin eban iges eta astelehenean lanera agertu ez zanez, ikerketearen fokuan ipini eta atxilotzeko agindua emon zan epaitegitik.
Indarkeria matxistaren eraginez 2022an Euskal Herrian hil daben lehen andrea da Sara Pina. Igaz bost hil ebezan, eta 2003. urtetik barriz, 112 dira eraildako andrak.