Bihar, daborduko klasiko bat dan bertso-saioa egindo da Diman. Unai Iturriaga eta Jon Maia egongo dira kantetan Luis Prieto bertso-saioaren hogetaseigarren edizinoan. Baina aurtengoan, proba barri bategaz osotuko dabe saioa. Izan be, Xabi Gonzalez Goti “Errot” eta Magali Lekue Urizar dimoztar korrikalariak, Larraungan tontorrera (1.008 m) igon eta bajatuten saiatuko dira, ordu bat eta hogei minututan.
Ekitaldia 19:00etan hasiko da eta Iturriaga eta Maiak “Errot” eta Lekueri Agurra kantau ostean, galapan urtengo dira Larraunganera, bertsolariak frontoi txikian saioagaz segidu bitartean. Txabila alkartekoen helburua da, “Errot” eta Lekuek marka bat itxi eta datorren urteko edizinoan, beste batzuk hau gaindituten saiatutea.