"Ikaragarria gure gazteek lortutakoa!", adierazo dau Euskadiko Euskal Pelota Federakuntzeak sare sozialetan, izan be, Euskal Selekzino gaztea Ath-en (Belgika) izan da Europako Junior Pelota Txapelketan eta domina gehien lortu dituan taldea izan da. Hamahiru jokalari gaztek eta lau entrenatzailek lortu dabe markea eta euren artean hiru arratiar egon dira. Txumuluxueta klub dimoztarreko Malen Lamadrid eta Dorkaitz Meabe jokalariak eta Lur Ziarrusta entrenatzaileak osotu dabe arratiar delegazinoa.
Guztira hamabi domina ekarri dabez bueltan Euskal Herrira gure pelotariek. Txapelketetan lau urre, bost zidar eta brontzezko sari bat lortu ditue OneWall, Joko Internazionala eta Llargues modalidadeetan. Hamar horreetaz gainera, Manex Etxeberri saratarrak txapelketako jokalari onenaren saria jaso dau eta domina gehien irabazteagatik, selekzino onenaren saria be jaso dau Euskal Selekzinoak.
Meabe eta Lamadrid
Dorkaitz Meabe eta Malen Lamadridek be hiru modalidadeetan hartu dabe parte eta euren aldetik be lortu ditue dominak. Meabek urrezko domina lortu dau Joko Internazionalean eta 10 urtez azpiko OneWallean zein Llarguesean zidarrezko domina bana lortu ditu. Lamadridek barriz, Joko Internazionalean zidarra eta Llarguesean brontzea irabazi ditu. Halanda be, 17 zein 19 urtez azpiko txapelketetan be aritu da eta finalak berak jokatu ez dituan arren, urre bat eta zidar bat lortu dituan taldearen parte izan da.
