Gazte Barri jantza talde dimoztarra martxan dago daborduko 2024-2025 denporaldiagaz. Aurten Auzorik auzo birea egingo dabe bertoko jantzariek Dimako auzoetatik eta lehen jantzaldia bihar, hilak 13, izango da Oban, arrastiz. Horrezaz gainera, jantzari barriak matrikuletako aukerea be zabaldu dau. 2020tik behera jaiotakoek emon leikie izena, hurrengo galdetegia beteta.
Behin izena emonda, matrikulau barriak taldeetako batean sartuko dira, adinaren arabera. HH4-5 mailakoek barikuetan izango ditue entrenamenduak, 16:30etik 17:00etara. LH1-2-3koak be barikuro batuko dira, 17:00etatik 18:00etara. LH4-5-6koak barriz, eguaztenetan 16:30etik 17:30era entrenauko dira. DBH eta Batxilergoan dagozan gazteak ostera eguenero, 16:30etik 17:30era, batuko dira eta helduak barikuetan 18:00etatik 19:00etara.
Arratiako jotea eta arin-arin
Ohiko matrikulazinoez gainera, Arratiako jotea eta arin-arin ikastaroa be antolatu dau Gazte Barrik. Hamasei urtetik gorakoentzako izango da ikastaroa eta eguenetan emongo da, 17:30etik 18:30era, urri bigarrenaren 3tik abenduaren 19ra arte. Izena gaztebarri@gmail.com helbidera idatzita emon daiteke.