Amaia Aldai pelotari dimoztarrak, Arrate Bergararen laguntzeagaz, atzo jokatu eban Bilboko Bizkaia pelotalekuan Hiru Hiriburuak txapelketako finala Leire Garaik eta Irati Zabalak osotutako bikotearen kontra. Bikote biek egin eben partidu "txukuna", Aldairen esanetan baina atzenean Dimakoak eta Bergarak lortu eben txapela, 22-19 irabazita.
Hasikera batean, 8-2ko aurrea hartuta erraz irabaziko ebela emoten baeban be, Garai eta Zabalak 15-14ra hurbildutea lortu eben. Baina atzenean, Aldaik eta Bergarak barriro emon eutsien bueltea partiduari. Holan kontau dau Aldaik: "Egia da hasikeran guk alde handia hartu dogula, nik peloteari abiadura handia emon deutsat eta ezin izan eben horregaz. Baina uste dot hainbesteko aldeagaz Arratek eta biok konfiantzea hartu eta aurkariak asmatuten hasi zirala. Bardindutea lortu eben, baina azkenengo txanpan barriro indar eta txispeagaz min handia egin dogu eta horregaitik lortu dogu txapela".