Laboral Kutxako Udako Torneoaren ligaxka fasearen bigarren partiduak jokatu dira astegoienean Lekeition eta Amaia Aldai pelotari dimoztarra bide onetik doa aurrera txapelketan. Andrea Capellanegaz batera, lehen faseko liderra da, oin arteko partidu biak irabazi ostean.
Lekeitioko partiduan, 22-13 garaitu dabez Olatz Arrizabalaga eta Irati Zabala. Barriro be, Santi Brouard pelotalekura hurbildu diranek Aldairen protagosnimoa igarri dabe. Berak markau dau jokoaren erritmoa eta asko asmatu dau erremateetan. Aldaik BEGITUn azaldu dauenez, "Capellanek Zabala apurtu eban atzean eta Arrizabalaga jokoz kanpo itxi genduan, gainetik pasauta".
Bigarren partiduan Leire Garai eta Nora Mendizabal izan dira garaileak, sailkapenean bigarren postua lortuta. 22-16 irabazi dabe Olatz Beitia eta Enara Gaminderen aurka.