Igorreko taldeak etxean hasiko dau klubaren historian garrantzia berezia izango dauan denporaldia. Igaz lortutako igoerearen ostean, Arratiak Bigarren Federazinoan jokatuko dau lehenengoz, Mario Quintas entrenatzaileak zuzenduta.
Arratiak hainbat partidu jokatu ditu liga hasikerea prestatzeko. Euskal Herria Kopako C1 moltsoan lehenengo postua lortu dau eta Laudioko San Roke Torneoa be irabazi eban, Hernaniri eta Elorriori irabazita. Aurredenporaldiko atzen partiduan, barriz, 1-2 galdu eban Bizkerre Aren kontra Urbietan.
Kopako finala bezperan
Liga hasi aurreko egunean, zapatuan, Euskal Herria Kopako C mailako finala jokatuko dau Arratiak Mulierren kontra, 13:30ean, Urbietan. Kopako finala eta ligako lehenengo jardunaldia astegoien berean diranez, Arratia A eta Arratia Bko jokalariek osotutako talde batek jokatuko dau finala.