Zemendiaren 20an, bere heriotzaren 50. urteurrena zala eta, atzen egunotan Francok protagonismo berezia izan dau hedabideetan. Gertaera horegaz gogora dakargu kaudilloa Arratiara hurreratu zan eguna: 1958ko abuztuaren 25ean, astelehenean, Arabara eta Bizkaira bisitea egin eban Francisco Franco Estatuburuak, besteak beste Aguas y Saltos del Zadorra S.A.ren instalazino hidroelektrikoak inauguretako, 1958ko abuztuaren 25ean.
Zadorra, Santa Engrazia eta Baias erreken urak biltzeako eregi ziran Ulibarri-Ganboa eta Urrunagako urtegi arabarren eta Zeanuriko Undurraga auzoan dagoan Barazargo zentral hidroelektrikoaren inaugurazinoagaz emon jakon hasikerea bisiteari.
Instalazino horreen betebeharra Altos Hornos de Vizcayak Barakaldon eta Sestaon eukazan lantegi siderurgikoentzako energia hidroelektrikoa ekoiztea zan; Bilbo Handiko eta Gasteizko ur hornikuntzea bermatuteko betebeharra geroagoko gauzea izan zan. Obra guztiak AHVren filiala zan Aguas y Saltos del Zadorra S.A.ren ardurapean egin ziran, eta 1947 eta 1958 urteen artean luzatu ziran.
Sasoi haretako egunkariek inoenez, Franco udako oporretan egoan Donostian; goizean handik abiatu eta 10:55ean heldu zan Ulibarri-Ganboara. Ailegeteaz batera Gasteizko Elizbarrutiko Peralta gotzainak urtegia bedeinkatu eban, jarraian Urrunagakora bisita laburra egin eben, eta ondoren Zeanurirantz zuzendu ziran Franco eta bere laguntzaileak.
Ondoetorria Ubiden
Errepidea, bereziki Araba eta Bizkaiko muga ingurua banderez eta “Franco, Franco” idatzita eroien pankartez josita agertu ei zan. Abuztuaren 25eko Hierro egunkariaren argazki batean ikusi daitekenez, kaudilloa agurtzeko “Vizcaya por España y por Franco” inoan arku handi bat jarri eben Ubideko sarreran. 11:45 inguruan, Zeanuriko Undurraga auzunean dagoan Barazago zentral hidroelektrikora heldu zan Franco, eta beragaz besteak beste, Planell, Industria Ministroa, Vigon, Obra Publikoetakoa eta Alonso Vega, Gobernazio Ministroa egozan. Gurpide Bilboko gotzainaren bedeinkapenaz, ofizialki inauguratu ziran zentral hidroelektrikoaren instalazio barriak.
Ostean, Bilborantz abiatu zan, Bilbon, Barakaldon eta Areetan egin behar ebazan bisitakaz jarraitzeko asmoaaz, “Zeanuri, Areatza, Artea, Igorre, Lemoa, Galdakao eta abarreko jentearen txalo artean” (Hierro, 1958-VIII-25). Gertaera ha ezagutu eben arratiar batzuk gaur egun gogoratuten dabenez, Francoren bisitea zala eta, errepideko batxeak hareaz eta galipotaz estali ebezan eta batek baino gehiagok esan ei eban: “Ia Franco sarriago etorten dan, holan errepidea konpondu egingo deuskue eta”.
Abuztuaren 26ko La Gaceta del Norte egunkariak holan inoan lehen orrialdeko izenburuan: “Vizcaya recibió a Franco engalanada, ofreciéndole el homenaje de su entusiasmo, desde Barazar hasta el Abra”. Egunkariek isildu ebena zera zan: kaudilloa agurtzera joateko baldintzapean, ordu libre eta ordainduak izan ebezela lantegietako beharginek.
