Zapatu eguerdian jokatu eban gizonezkoen Arratia Ak ligako atzen partidua eta 5-1 irabazi eban Basurto A taldearen kontra Urbietan. 0-1 hasi zan galtzean Arratia 15. minutuan kanpotarrek sartutako gola dala-ta, baina atsedenaldira heldu orduko Jokin Ramirezek 42. minutuan eta Diego Faulinek penaltiz 44. minutuan sartutako golek 2 eta 1ekoa ipini eben markagailuan. Bigarren zatian Jon Ordeñanak, Amin Chairak eta Jokin Ramirezek sartu ebezan golak. Arratia Ak seigarren postuan amaitu dau ligea 56 puntugaz.
Gizonezkoen Arratia B taldeak eta Lemoako Harrobik zapatu arrastian jokatu eben derbia eta ligako atzen partidua. Lemoaztarrak 0-1 heldu ziran atsedenaldira Oier Zalduegik 11. minutuan sartutako golari esker. Bigarren zatian Arratia Bk bueltea emon eutsan markagailuari Ibon Agirretxek 70. minutuan eta Nikola Eguzkizak 73. minutuan sartutako golei esker. Ligea amaituta Arratia Bk hamaikagarren postuan amaitu dau 42 puntugaz eta Lemoako Harrobik hamabigarrenean puntu bardinakaz.
Liga amaiereak agur batzuk ekarri ebazan be joandako zapatuan eta Arratia A eta B taldeetako zazpi jokalarik agur esan deutsie Arratiari. Arratiako Ako Koldo Errekagorri, Ander Gondra atezaina eta Diego Faulin kapitaina eta Bko Mikel Cardo kapitaina, Aimar Iturrondobeitia, Mikel Sarobe eta Borja Jauregi atezaina.
Arratiak Jose Luis Mendilibar omenduko dau
"Bere kirol ibilbide arrakastatsua omentzeaz gain, 95/96 denboraldian lortutako 3. mailara igoerea eta Arratiaren gainean beti euki dauzan berba onak eskertu gura doguz" dinoe Arratia taldekoek. "Horretarako, bagilaren 7an, Arratia eta SD Eibar taldeen arteko beteranoen partidua antolatu dogu, beste ekintza batzuen artean. Ezin dozue hutsik egin!" adierazo dabe.