Lemoako Harrobik eta Arratia Bk zapatu arrastian jokatu eben derbia Lemoan eta bana bardindu eben. Lemoako Harrobi aurreratu zan markagailuan eta bat eta hutsekoagaz heldu ziran atsedenaldira 38. minutuan Asier Beldarrainek sartutako golari esker; bigarren zatian ostera Arratiak partidua bardindu ahal izan eban Jokin Goti zeanuriztarrak 65. minutuan sartutako golagaz. Epaileak 7. minutuan partidua gelditu behar izan eban Arratiako jarraitzaileen petardo eta bengalengaitik. 17 jardunaldiren ostean hamargarren postuan dago Arratia B 22 puntugaz eta hamahirugarren Lemoako Harrobi 18gaz. Datorren partidua barriro jokatuko dau Arlonagusian Lemoako Harrobik Gernika B taldearen kontra hilaren 25ean, arrastiko 17:45ean. Arratia Bk ostera Urbietan jokatuko dau Etxebarri A taldearen kontra hilaren 25ean, arrastiko 17:15ean.
Gizonezkoen Arratia A taldeak domeka goizean jokatu eban etxetik kanpo Basurto A taldearen kontra eta 0-1 irabazi eban. Gola lehen zatiko 10. minutuan sartu eban Azibar Sagarna golegile igorreztarrak, aurten 10 gol sartu ditu daborduko. 17 jardunaldiren ostean 30 puntu ditu Arratia Ak eta zazpigarren postuan dago. Datorren partidua etxetik kanpo jokatuko dau barriro Ugeraga A taldearen kontra hilaren 26an, goizeko 11:30ean.
Andrazkoen Arratia A taldeak zapatu arrastian jokatu eban bigarren itzuliko lehen partidua Oyonesa talde arabarraren kontra eta 5-0 irabazi eban. Lehen zatian Irati Artaraz bediaztarrak hiru gol segiduan sartu ebazan 16., 19. eta 28. minutuetan. Itsaso Kumik sartu eban atsedenaldira heldu orduko arratiarren laugarrena. Bigarren zatian, 73. minutuan, Amaia Alzagak sartu eban bosgarren gola aurkarien atezainaren huts bateri esker. Epaileak 90. minutuan Oyonesakoen atezaina kanporatu eban baloia eskuagaz joteagaitik areatik kanpo. 17 jardunaldiren ostean 36 puntu ditu Arratiak eta hirugarren postuan dago. Liderra dan Athletic C hiru puntura eta Bizkerre, bigarrena, puntura batera ditu Igorreko taldeak. Datorren astegoienean ez dabe partidurik jokatuko eta hurrengo norgehiagokea zezeilaren 1ean jokatuko dau Arratiak Urbietan Bilbao Artizarrak taldearen kontra, arrastiko 18:00etan.
Andrazkoen Arratia B taldeak zapatu arrastian jokatu eban etxetik kanpo Indartsu taldearen kontra eta 2-0 galdu eban. Hamahiru jardunaldiren ostean 24 puntu ditu Arratia Bk eta laugarren postuan dago. Datorren partidua etxetik kanpo jokatuko dau Basauriko Kimuak B taldearen kontra hilaren 25ean, arrastiko 19:00etan.