Laminetxe Gaztetxearen hirugarren urteurrena ospatuko dabe astegoien honetan

Ager Barragan 2025ko mai. 7a, 12:24

Areatzako gaztetxearen ateak barriro zabaldu ziranetik hiru urte pasa dirala ospatuteko, urteurrenerako hainbat ekintza antolatu ditue maiatzaren 8, 9 eta 10erako.

III. urteurrenera begira eta astegoiena ondo hasteko, auzolana deitu dabe biharko, hilak 8, 18:00etatik aurrera gaztetxea jairako prestatuteko "atzenengo ikutuak" emoteko.

Dana prest egonda, barikuan, hilaren 9a, egun osoan zehar herrira urtengo da gaztetxea, atzen urteetan egindako ekintza kultural, berbaldi, tailer, auzolan, ekitaldi eta abarren kartel eta argazkien erakusketeagaz. Asanbladatik aurreratu dabenez, mapa baten laguntzeagaz, ibilbidetxo historikoa osotuko dabe. Urteurreneko jai nagusia ostera, hurrengo egunean, hilak 10, ospatuko da gaztetxean bertan.

Hemen jai nagusiko egitaraua: 

12:30- Arratiako Euskara Taldearen aurkezpena: 
Ze aisialdi mota dekogu Arratien? berbaldia.

15:00 - Bertso bazkaria arratiar bertsolari gazteakaz: 
Enara Gallastegi 
Alaia Irurtia 
Iradi Barrenetxea 

18:00 - Bafle poteoa jolasakaz herrian zehar.

22:00 - Kontzertuak
Vinagre de moderna (Arratia)
Kuter (Busturialdea)
Matxinada (Zeberio).

Egin zaitez Begitu-lagun!

Begitu da Arratiako euskerazko aldizkari bakarra, eta zu bezalako irakurleen babesa behar dau aurrera egiteko. Zeuk be gugaz bat egin gura dozu?


Izan zaitez Begitu-lagun!