Astegoienean ospatuko dira Karpoko Jaiak

Erredakzinoa 2025ko api. 30a, 11:49

Argazkia jaiak.eus webgunetik hartuta

Areatzako Karpoko jaiak dirala-ta, herri osoan giro alaia espero da hilaren 2 eta 3an, bariku-zapatuan hain zuzen be.

Bariku iluntzean trikitilariak ibiliko dira herritik eta zapaturako, egun osorako egitarau potoloa antolatu da: lehiaketa gastronomikoak, merkadua, Areatzako Bandaren kalejirea, plastikuzko ahateen lasterketea, giza proben desafioa eta jaiakaz amaituteko, DJ kalejirea.

Esan moduan, barikuan hasiko da herria girotuten. Honetarako, Etxebarria aita-seme trikitilariak konbidau ditue, 20:00etatik aurrera herrian zehar trikitixeari eta panderoari eragiteko.

Hurrengo egunean barriz, goizean goiz beteko da Areatza jentez. 10:00etan, Ganadu, Artisau eta Ekoizle Azokako postuak zabalduko dira, 13:30era arte. Goizean zehar be, Paella eta Gisadu Lehiaketarako platerak prestatuten ibiliko dira talde ugari errekako paseoan eta 12:30etik aurrera, Areatzako Bandea ibiliko da herritik, instrumentuak eskuan, Doinuak jairik jai kalejireagaz poteoa girotuten.

Paella eta Gisadu Lehiaketarako platerak 14:00etarako aurkeztu beharko dira eta 15:00etan bazkari herrikoia egin ostean hasiko da arrastiko egitaraua. Aurten be, 17:00etan, plastikuzko ahate lasterketea jokatuko da errekan behera, zubira lehenengo nor helduko. Lehia ez da hemen amaituko, 18:30ean, herriko talde misto bi alkarren kontra ibiliko dira-ta, giza proba desafioan. Hau amaituta, jai girora bueltauko dira billaroztarrak, 20:00etatik aurrera DJ TRACK-A ibiliko da-ta herrian zehar musikea ipinten.

Egin zaitez Begitu-lagun!

Begitu da Arratiako euskerazko aldizkari bakarra, eta zu bezalako irakurleen babesa behar dau aurrera egiteko. Zeuk be gugaz bat egin gura dozu?


Izan zaitez Begitu-lagun!