proiekzinoa

'Bizkarsoro' filma Areatzan proiektauko da barikuan eta Ubiden zapatuan

Asier Abrisketa 2024ko mar. 13a, 11:00

Martiaren 15ean, Areatzako udaletxeko areto nagusian 18:30ean eta 16an Ubiden 19:00etan egongo da ikusgai XX. mendeko Iparraldean, euskerearen egoerea islatzen daben bost istorio batzean dauzan filma.

Bizkarsoro filma proiektauko da Areatzan eta Ubiden astegoienean. Donostiako Zinemaldian aurkeztu zan Josu Martinezek zuzendutako benetako istorioa kontetan dauan fikzinozko film hau.

Bizkarsoro herria ez da existiduten eta bizkarsorotarrak fikzinozko pertsonaiak dira, baina zelanbait, euskeraz biziteagaitik jazarriak izan diran euskaldun guztiak dira bizkarsorotarrak. 1914tik 1982ra bitartean gertatzen diran bost istoriok osatuten dabe filma. Ahozko lekukotzetan eta idatzitako testuetan oinarrituta dagoz, bost hamarkadatako kontakizuna egiteko.

Pelikuleak, Ipar Euskal Herriko herri txiki batek bizi izandako aldaketa sozialak erakusten ditu, baita euskerearen zuztartze eta urruntzea eta euskerearen bizirauteko burrukea be. “Frantzia sortu zan. Frantsesak sortzea falta zan bakarrik”, pelikulako kartelean azaltzen dan moduan.

Arratiako emonaldiak

Arratiako estreinaldia Igorren izan zan zezeilaren 18an, Korrika Kulturalaren barruan. Gero, Diman egon zan ikusgai martiaren 1ean.  Areatzan pelikulea ikusteko aukerea martiaren 15ean egongo da eta Ubiden 16an; Artean, aprilean. Izan be, urtailean, UEMAk hitzarmen bat sinatu eban Gastibeltza Filmak ekoizleagaz eta Dijitalidadea Banatzaileagaz UEMAko udalerrietan eskaintzeko erraztasunak emoteko eta emonaldiaren kostuaren erdia UEMAk hartuko dau bere gain. 

Egin zaitez Begitu-lagun!

Begitu da Arratiako euskerazko aldizkari bakarra, eta zu bezalako irakurleen babesa behar dau aurrera egiteko. Zeuk be gugaz bat egin gura dozu?


Izan zaitez Begitu-lagun!